Laun félagsfólks á almennum vinnumarkaði ráðast af markaðsaðstæðum en ekki fyrirmælum kjarasamninga.
Á almennum vinnumarkaði var fyrst gerður samningur milli Samtaka atvinnulífsins (SA) og 20 aðildarfélaga BHM árið 2008. Núgildandi kjarasamningur gildir frá 1. maí 2025. Hann er ótímabundinn, en með fyrirvara um endurskoðun ef gerðar eru almennar breytingar á réttindum launafólks á almennum vinnumarkaði.
Með snjallleit Visku getur þú nálgast allar upplýsingar á vefsíðu félagsins með einföldum og fljótlegum hætti.
Með snjallleit Visku getur þú nálgast allar upplýsingar á vefsíðu félagsins með einföldum og fljótlegum hætti.
Í kjarasamningi Samtaka atvinnulífsins og aðildarfélaga BHM er ekki samið um tiltekin laun, hvorki tiltekna launataxta fyrir dagvinnu né mánaðarlaun. Launakjör háskólafólks á almennum vinnumarkaði eru því ekki ákveðin með kjarasamningi heldur ráðast af því sem um semst milli starfsmanns og vinnuveitanda. Kjarasamningur SA og BHM fjallar fyrst og fremst um réttindi og skyldur starfsfólks og vinnuveitanda, eins og vinnutíma, veikindarétt, orlof, uppsagnir o.s.frv.
Aðilum ráðningarsamnings er heimilt er að semja um föst mánaðarlaun. Með sama hætti er heimilt að semja um fasta þóknun fyrir yfirvinnu sem og annað vinnuframlag starfsmanns sem unnið er utan dagvinnutímabils.
Hagstofa Íslands birtir upplýsingar um laun á almennum markaði eftir starfi og kyni.
Starfsmaður á rétt á viðtali við yfirmann einu sinni á ári um störf sín, þ.m.t. frammistöðu og markmið og hugsanlegar breytingar á starfskjörum. Vinnuveitandi getur einnig haft frumkvæði að árlegum viðtölum við starfsmenn og ákveður hvenær ársins þau eru tekin. Niðurstaða viðtals skal liggja fyrir innan mánaðar.
Við launaákvarðanir á almennum vinnumarkaði skal, sem endranær gætt, ákvæða laga um jafna stöðu og jafnan rétt kynjanna sem og laga um jafna meðferð á vinnumarkaði.
Opinber hlutafélög (OHF) eru ekki ríkisstofnanir í skilningi laga og heyrir starfsfólk þeirra ekki undir lög um réttindi og skyldur starfsmanna ríkisins. Um starfskjör þeirra fer því samkvæmt ráðningarsamningi og gildandi kjarasamningi hverju sinni, sem og almennum reglum íslensks vinnuréttar.
Opinbert hlutafélag merkir samkvæmt lögum um hlutafélög, félag sem hið opinbera, einn eða fleiri hluthafar, á að öllu leyti, beint eða óbeint.
Félagsfólki er ráðlagt að hafa samband við sitt aðildarfélag innan BHM til að fá nánari upplýsingar um laun og önnur starfskjör í sinni starfsgrein, þ.m.t. á grundvelli sérsamninga sem gerðir hafa verið við fyrirtæki á almennum vinnumarkaði, s.s. Orkuveitu Reykjavíkur, RARIK ohf. og RÚV ohf.
Gögn þessi koma frá BHM, seinast uppfærð 23. júní 2026.