Almennur vinnumarkaður

Kjarasamningur Samtaka atvinnulífsins (SA) og aðildarfélaga BHM (sem m.a. nær til félagsfólks í félögum eins og Félagi sjúkraþjálfara, Sálfræðingafélagi Íslands, Þroskaþjálfafélagi Íslands o.fl. sem starfa hjá einkareknum heilbrigðisþjónustuaðilum, sjálfseignarstofnunum eða öðrum fyrirtækjum á almennum vinnumarkaði) kveður á um stuðning við starfsþróun og endurmenntun á eftirfarandi hátt:

Fræðsla og starfsmenntun

Starfsmenn eiga rétt á að sækja fræðslu, námskeið og þjálfun sem stuðlar að því að þeir viðhaldi og þrói þá hæfni sem starfið krefst. Slík fræðsla er mikilvæg fyrir starfsþróun og gæði þjónustu og á að vera í samræmi við markmið og starfsemi vinnustaðarins.

Samráð og ábyrgð vinnuveitanda

Vinnuveitandi ber ábyrgð á því að fylgjast með þörf fyrir endur- og símenntun í samráði við starfsmenn. Markmiðið er að tryggja að hæfni starfsfólks haldist í takt við breytingar á vinnustaðnum og í starfsumhverfi almennt.

Frumkvæði starfsmanns og réttur til námsleyfis

Starfsmaður getur sjálfur lagt til þátttöku í námskeiðum, ráðstefnum eða fræðslu sem nýtist í starfi. Einnig getur starfsmaður óskað eftir námsleyfi til að sækja formlegt nám eða önnur úrræði sem efla starfshæfni hans. Vinnuveitandi metur hvort forsendur séu til staðar og hvort viðkomandi fræðsla sé í samræmi við þarfir vinnustaðarins.

Kostnaður og launagreiðslur

Ef þátttaka í námskeiði er samþykkt af vinnuveitanda, heldur starfsmaður fullum launum á meðan á þátttöku stendur. Einnig skal vinnuveitandi endurgreiða útlagðan kostnað, svo sem námskeiðsgjöld og ferða- eða dvalarkostnað, nema sérstaklega hafi verið samið um annað.

Markviss starfsþróun og árleg samtöl

Í kjarasamningi SA og BHM er jafnframt tekið fram að starfsfólk eigi rétt á árlegu samtali við yfirmann um störf sín, frammistöðu, starfsþróun og hugsanlegar breytingar á starfskjörum.

Þessi samtöl eiga að fara fram einu sinni á ári og niðurstaða þeirra skal liggja fyrir innan mánaðar. Þar má m.a. ræða um mögulega fræðsluþörf, þátttöku á námskeiðum og fyrirlestrum.

Starfsmenntunarsjóður BHM

Í kjarasamningnum er kveðið á um skyldu vinnuveitenda til að greiða 0,22% af heildarlaunum í Starfsmenntunarsjóð BHMStarfsmenntunarsjóð BHM.

Þetta veitir félagsfólki rétt til að sækja um styrki vegna:

• Háskólanáms
• Faglegra námskeiða
• Ráðstefna og málþinga
• Kynnisferða sem hafa fræðslugildi

Vísindasjóður og Starfsþróunarsetur háskólamanna

Í samningnum er einnig gert ráð fyrir:

• Framlögum í Vísindasjóð (kafli 6.6):  Heimilt er að semja við starfsmann um að atvinnurekandi greiði framlag í Vísindasjóð viðkomandi stéttarfélags.
• Framlögum í Starfsþróunarsetur háskólamanna (0,70% af heildarlaunum): Réttur til styrks er bundinn við starfsmann, ekki vinnuveitanda þegar um fyrirtæki á almennum vinnumarkaði er að ræða.

Ráðgjöf

Félagsfólki er ráðlagt að leita ráðgjafar um réttindi til endurmenntunar hjá sínu stéttarfélagi innan BHM.

Upplýsingar um styrki og greiðslur úr starfsmenntasjóðum má nálgast á vefsvæði sjóða BHM.