Viska og YKA í formlegt samstarf
Þessa dagana er unnið að því að formgera samstarf Visku við sambærileg stéttarfélög á öllum Norðurlöndunum en hugmyndin að baki Visku byggir á norrænum fyrirmyndum og félagið leggur ríka áherslu á að nýta sér reynslu erlendra stéttarfélaga þegar kemur að því að þróa þjónustu og hagsmunagæslu fyrir félagsfólk.
Á dögunum undirritaði Viska samstarfssamninga við norska stéttarfélagið Samfunnsviterne og við sænska stéttarfélagið Akavia sem kveða á um gagnkvæma þjónustu við félagsfólk við flutning á milli þeirra landa og Íslands. Þannig getur félagsfólk Visku sem flytur til þessara landa nú nýtt sér þjónustu þessara systurfélagaga Visku og fengið upplýsingar og aðstoð við vinnumarkaðstengd mál. Einnig var ákveðið að efla formlegt samstarf félaganna með reglulegri upplýsingamiðlun og ráðgjöf varðandi þróun þjónustu við félagsfólk.
Nú hefur Viska gert sambærilegan samstarfssamning við stéttarfélagið YKA í Finnlandi. Félagið hefur ríflega 14 þúsund félagsmenn og hefur verið frumkvöðull á sviði þjónustu og trygginga fyrir sitt félagsfólk. Félagsfólk Visku sem hyggur á flutning til Finnlands, hvort sem er í nám eða starf, getur nú haft samband við skrifstofu Visku og fengið frekari upplýsingar.