Aðför að samningsfrelsi heilbrigðisstétta
Viska og Félag talmeinafræðinga telja frumvarp til breytinga á lögum um Sjúkratryggingar Íslands aðför að samningsfrelsi heilbrigðisstétta. Bent er á að sjálfstætt starfandi talmeinafræðingar hafa setið verulega eftir í launaþróun síðustu ár. Þetta kemur fram í umsögn félaganna um breytingar á lögum um Sjúkratryggingar.
Í umsögninni er vísað í nýlega könnun félaganna um starfsaðstæður og kjör talmeinafræðinga á Íslandi. Kemur þar m.a. fram að um 40% talmeinafræðinga sem starfa á samningi við Sjúkratryggingar Íslands (hér eftir „SÍ“) íhuga nú að hætta störfum og 70% eru óánægð með kjör sín. Komið er að ögurstundu í samningaviðræðum sjálfstætt starfandi talmeinafræðinga við ríkið og verði frumvarpið óbreytt að lögum stefnir í fjöldaflótta úr stéttinni.
Tillögur að breytingum á 38. grein og önnur atriði
Í ljósi ofangreinds hvetja félögin stjórnvöld til að endurskoða skaðleg áform um inngrip í samningsrétt heilbrigðisstétta og leggja eftirfarandi til:
- Aðlaga ætti breytingar á á 38 grein svo:
„Séu samningar um heilbrigðisþjónustu ekki fyrir hendi skv. IV. kafla er sjúkratryggingastofnuninni í sérstökum tilfellum heimilt að greiða tímabundið, að hámarki í 3 mánuði, kostnað vegna veittrar þjónustu á grundvelli gjaldskrár sem sjúkratryggingastofnunin gefur út. Heimildin er ekki endurnýjanleg nema að undangengnu óháðu milligönguferli eða gerðardómi. Gjaldskrár samkvæmt ákvæði þessu skulu endurskoðaðar eftir þörfum með tilliti til verðlags- og launaþróunar í landinu þar sem miðað er við vísitölu neysluverðs og launavísitölu Hagstofu Íslands.“
- Félögin eru mótfallin eftirfarandi viðbót við lögin enda felst í því aðför að samningsrétti heilbrigðisstétta:
„Þjónustuveitanda sem þiggur greiðslur á grundvelli 1. mgr. er óheimilt að krefja sjúkratryggðan um frekara gjald en leiðir af gjaldskrá og almennri greiðsluþátttöku sjúkratryggðra í kostnaði vegna heilbrigðisþjónustu“
Að lokum vilja félögin ítreka það sem kom fram í fyrri umsögn í samráðsgátt:
- SÍ verði gert að birta kostnaðarlíkan, forsendur stýringar og áhrifamat á aðgengi áður en ný gjaldskrá tekur gildi. Taka verður til skoðunar hvort rétt sé að skilgreina viðkvæma hópa betur svo tryggt sé að þeir verði undanþegnir magnstýringum sem valda seinkun á endurhæfingar- og þroskaferli.
- Að heimild til að láta tiltekinn kostnað falla utan afsláttarstofns nái ekki til talmeinafræðinga, með tilheyrandi auknum útgjöldum fyrir skjólstæðinga.
- Að auknar heimildir SÍ til gagnaöflunar og eftirlits verði skýrt afmarkaðar, gagnsæjar og í samræmi við persónuvernd og jafnræði. Félögin styðja eðlilegt eftirlit en leggja áherslu á samráð um verklag og viðmið.
- Að undanþága fyrir „umfangslítinn rekstur“ og smærri starfseiningar t.a.m. einyrkja sé skýr, fyrirsjáanleg og tryggð í reglugerð þannig að talmeinafræðingar þurfi ekki að breyta rekstrarformi án efnislegs ávinnings fyrir þjónustugæði eða gagnsæi