Sögulegt samstarf SHÍ og Visku
Ný staða kjara- og réttindafulltrúa háskólanema verður sett á laggirnar sem hluti af samstarfssamningi sem Stúdentaráð Háskóla Íslands (SHÍ) og Viska hafa gert með sér. Er þetta í fyrsta sinn sem slík þjónusta verður í boði fyrir háskólanema hér á landi. Þetta eru ekki aðeins tímamót í þjónustu SHÍ við háskólanema heldur einnig ný skref í þjónustuframboði íslensks stéttarfélags.
Arent Orri J. Claessen, forseti SHÍ (t.v. á mynd) og Gauti Skúlason, verkefnastjóri samskipta og markaðsmála hjá Visku (t.h. á mynd) undirrituðu samninginn á Háskólatorgi á dögunum. Kjara- og réttindafulltrúinn mun veita þjónustu og ráðgjöf auk þess að vinna að því að efla vitund háskólanema um sín réttindi á vinnumarkaði.
„Við hjá SHÍ erum ótrúlega stolt af því að geta nú boðið nemendum í HÍ upp á kjara- og réttindatengda þjónustu og teljum stöðuna löngu tímabæra. Slíkt hefur aldrei verið gert áður hér á landi og því er þetta sögulegur áfangi í þjónustu við nemendur. Næsta skref er að auglýsa stöðu kjara- og réttindafulltrúa háskólanema við skrifstofu SHÍ og í framhaldinu hefst þessi nýja þjónusta fyrir nemendur við HÍ. Við hjá SHÍ erum ánægð með samstarfið við Visku og hlökkum mikið til framhaldsins,“ segir Arent Orri.
Við Visku stofnun Visku var komið á fót sérstakri námsmannaþjónustu fyrir háskólanema. Þjónustan virkar þannig að háskólanemar sem skrá sig í Visku fá aðgengi að allri þjónustu Visku og fría snjalltryggingu fyrir tölvu, síma og hjól.
„Staða kjara- og réttindafulltrúa háskólanema er að norrænni fyrirmynd þar sem hún hefur sannað mikilvægi sitt. Í samtölum okkar við háskólanema höfum við fundið fyrir því að eftirspurn eftir fræðslu um kjara- og réttindamál hjá ungu fólki er mikil og við viljum svara því kalli. Með því að koma stöðunni á laggirnar viljum við leggja ríka áherslu á styðja við ungt fólk sem er að afla sér þekkingar og háskólamenntunar, enda gríðarlega mikilvægur hópur fyrir framtíðina. Þannig sýnum við í verki að háskólanemar skipta máli,” segir Gauti.