Rithöfundasamband Íslands og Viska í samstarf
Með samningnum færist stéttarfélagshluti RSÍ yfir til Visku, sem mun veita félagsfólki RSÍ styrkari stoðir og víðtækari þjónustu á sviði kjara- og réttindamála. Sérfræðingar Visku munu í nánu samráði við RSÍ greina og þróa kjara- og réttindastöðu rithöfunda með það að markmiði að tryggja þeim stuðning og faglega vernd á vinnumarkaði. Þessi breyting felur jafnframt í sér að tenging RSÍ við BHM verður framvegis í gegnum félagsnet rithöfunda og skrifandi stétta innan Visku.
Margrét Tryggvadóttir formaður RSÍ (t.v.) og Brynhildur Heiðar- og Ómarsdóttir formaður Visku (t.v.).
Með þessari breytingu fá félagar í RSÍ aðgang að þjónustu Visku – stærsta aðildarfélagi BHM með tæplega sex þúsund manns – sem sérhæfir sig í hagsmunum háskólamenntaðra á vinnumarkaði. Félagsfólk í RSÍ getur leitað til sérfræðinga Visku varðandi öll kjara- og réttindamál og notið þeirrar þjónustu sem félagið veitir.