Námslína fyrir trúnaðarmenn
Á næstu misserum hyggst Viska stórefla trúnaðarmannakerfi sitt. Félagið mun bæði fjölga trúnaðarmönnum innan sinna raða og leggja aukna áherslu á fræðslu, faglega umgjörð og stuðning við trúnaðarmenn. Samkomulagið við Mental ráðgjöf er mikilvægt skref í þeirri vegferð og endurspeglar skýran metnað til að styrkja trúnaðarmenn í sífellt flóknara og krefjandi starfsumhverfi.
Innan námslínanna eru vinnustofur þar sem m.a. verða rædd:
- hlutverk og ábyrgð trúnaðarmanna í nútímavinnuumhverfi
- geðheilbrigði á vinnustað, viðkvæm samtöl, erfið samskipti og fyrstu viðbrögð
- raunveruleg dæmi úr starfi trúnaðarmanna
Námslínan er sett upp sem blandað lærdómsferli þar sem staðbundin fræðsla, rafræn fræðsla og sjálfstæð verkefnavinna styðja hvert annað og mynda samfellda heild. Áætlað er að fræðslan hefjist á haustmánuðum og mun Viska upplýsa trúnaðarmenn sína nánar þegar nær dregur.
Nánari upplýsingar um hlutverk trúnaðarmanna og starf þeirra má finna á heimasíðu Visku. Félagsfólk sem hefur áhuga á að taka að sér trúnaðarmannshlutverk á sínum vinnustað er hvatt til að hafa samband við skrifstofu félagsins.