Ég er að fara í starfsmannasamtal
Á vinnumarkaði er algengt að starfsfólki sé boðið í samtal við yfirmann til að ræða um starfið, líðan, verkefni, starfsaðstæður, starfsþróun og markmið. Samtölin geta borið mismunandi heiti eins og t.d. starfsmannasamtal, starfsþróunarsamtal, frammistöðumat eða launaviðtal . Inntak samtalsins getur því verið ólíkt eftir vinnustöðum.
Mikilvægt er að undirbúa sig vel fyrir samtal af þessu tagi. Vinnuveitendur boða gjarna til samtals með formlegum hætti og afhenda starfsfólki eyðublað sem gert er ráð fyrir að sé fyllt út fyrir fram. Gefðu þér tíma til að velta fyrir þér hverju þú vilt koma á framfæri í samtalinu.
Þetta er þitt tækifæri til að ræða starfið þitt, verkefni, ábyrgð, starfsaðstæður, starfsþróun og væntingar til framtíðar. Ef starfið þitt hefur breyst, ábyrgð aukist eða starfslýsing er ekki lengur í samræmi við raunveruleg verkefni er mikilvægt að koma því skýrt á framfæri.
Hvernig get ég undirbúið mig?
Áður en þú mætir í samtalið getur verið gagnlegt að velta eftirfarandi fyrir sér:
- Hver eru helstu verkefnin mín í dag?
- Hefur starfið mitt breyst frá síðasta samtali eða frá ráðningu?
- Er starfslýsingin mín í samræmi við raunveruleg verkefni og ábyrgð?
- Hef ég tekið að mér ný verkefni eða aukna ábyrgð?
- Hvað gengur vel í starfinu og hvað mætti betur fara?
- Eru atriði í starfsumhverfinu sem hafa áhrif á líðan, álag eða árangur?
- Hvaða fræðslu, símenntun eða starfsþróun þarf ég til að sinna starfinu vel?
Ekki er kveðið beint á um starfsmannasamtöl eða starfsþróunarsamtöl í kjarasamningi Visku við ríkið. Hins vegar er oft í stofnanasamningum tiltekið að árlega skuli starfsfólk eiga kost á slíku samtali.
Samkvæmt kjarasamningi Visku og Sambands íslenskra sveitarfélaga á starfsmaður rétt á starfsþróunarsamtali einu sinni á ári.
Í starfsþróunarsamtali er farið yfir starfslýsingu, frammistöðu, markmið og hugsanlegar breytingar á störfum. Einnig á að ræða þarfir og óskir starfsmanns til þjálfunar og símenntunar og hvernig starfstengt nám geti nýst viðkomandi starfsmanni og vinnustaðnum.
Starfsmaður getur óskað eftir starfsþróunarsamtali og skal það veitt svo fljótt sem auðið er.
Í kjarasamningi Visku við Reykjavíkurborg kemur skýrt fram að starfslýsingar skuli yfirfarnar í árlegum starfsþróunarsamtölum.
Í kjarasamningi Visku og Félags atvinnurekenda annars vegar og Visku og Samtaka atvinnulífsins hins vegar er tekið fram að árlega eigi starfsmaður rétt á viðtali við sinn yfirmann um störf sín, þ.m.t. frammistöðu, markmið og hugsanlegar breytingar á starfskjörum.
Samkvæmt kjarasamningi Visku og Launanefndar þjóðkirkjunnar skal starfsmaður eiga rétt á starfsmannasamtali við yfirmann sinn einu sinni á ári. Í framhaldi af samtalinu á starfsmaðurinn síðan rétt á launaviðtali um hugsanlegar breytingar á starfskjörum.
Kjarasamningur Visku og RARIK ohf. inniheldur sérstaka bókun um rétt starfsfólks til viðtals við yfirmann einu sinni á ári um störf sín, þ.m.t. frammistöðu og markmið og hugsanlegar breytingar á starfskjörum.