Kjaraviðræður í fullum gangi
Kjaraviðræður eru komnar í fullan gang eftir hlé í sumar og funduðu fulltrúar Visku með samninganefndum Reykjavíkurborgar og Sambands íslenskra sveitarfélaga í þessari viku. Var samtalið á fundunum gott og áframhaldandi fundir hafa verið boðaðir í næstu viku.
Félagið vill klára kjarasamninga við sveitarfélögin hratt og vel án þess að gefa afslátt af sínum kröfum. Á fundum hefur félagið meðal annars lagt áherslu á stöðu háskólamenntaðra sérfræðinga í starfsmatskerfum og leiðir til að meta þekkingu og starfsreynslu að verðleikum. Ein af ófrávíkjanlegum kröfum Visku er að í samningunum sé að finna afturvirkni.
Viska heldur félagsfólki sínu upplýstu um gang kjaramála með reglubundnum hætti. Á fréttasafni á vefsíðu félagsins getur þú fundið allar fréttir um yfirstandandi kjaraviðræður.