70% félagsfólks Visku vill klára aðildarviðræður við ESB
Um 70% félagsfólks Visku er hlynnt því að ljúka aðildarviðræðum við Evrópusambandið og 78% þeirra sem ætla að kjósa í lok vikunnar hyggjast segja „já“ við áframhaldandi viðræðum. Þótt mikill vilji sé til að klára viðræðurnar er fólk ekki búið að gera upp hug sinn um inngöngu í ESB. Aðeins 45% eru hlynnt inngöngu Íslands í ESB á þessari stundu en 34% segjast óviss. Fólk virðist gera skýran greinarmun á því að ljúka aðildarviðræðum og að taka afstöðu til aðildar Íslands að ESB.
Þetta er meðal þess sem kemur fram í könnun Visku sem framkvæmd var meðal um 6.000 sérfræðinga innan félagsins í júlí 2026. Um 1.400 svör af opinberum- og almennum vinnumarkaði bárust frá fólki í fjölbreyttum störfum á öllum aldri.
Viska mun þó ekki fjalla um kosti og galla aðildar að ESB að þessu sinni. Ástæðan er einföld: Þjóðin er ekki að taka afstöðu til aðildar að ESB heldur til þess hvort ljúka eigi aðildarviðræðum og leggja niðurstöðuna í dóm þjóðarinnar síðar meir.
Verði niðurstaðan á laugardag sú að halda viðræðunum áfram mun Viska leggja áherslu á að félagsfólk fái vandaðar, hlutlægar og yfirvegaðar upplýsingar um kosti og galla aðildar í aðdraganda seinni þjóðaratkvæðagreiðslunnar. Hvort sem ætlunin er að segja já eða nei á laugardag hvetur Viska alla til að nýta kostningaréttinn og hafna upplýsingaóreiðu. Virkt lýðræði byggir á því að kjósendur hafi sem bestar upplýsingar þegar þeir taka afstöðu til mikilvægra mála sem varða framtíð Íslands.